В Мудрикові при дзвінници
Што на горбі з церквом стоїт
Русин з Карпат від Криниці
Зібравши опришків своїх
Гварит до них камарати
Може би так в тот сьвіт піти
Штоб хоц кус його пізнати
Й товдиль його зрозуміти
Зібралося кус русинів
Вшитки в роках Ісусових
Штоб разом піти в чужину
І зазнати пригід нових
Кусцьок ишли кус плинули
Річками што течут з гори
І так рускій край минули
Чужим пройшли аж до моря
Же русини сут шпарливи
Идучи в сьвіти незнани
Свойой мудрості не крили
Кус пінязи вшили в штани
Же то можутся придати
Якби пришла дака біда
Втовдиль треба да што мати
Хоцби на окрайчик хліба
Юж над морем сут якисим
Студінь вітер під кабатом
Родит не створени мисли
Яких не є чим вигнати
Як виженеш мисли глупи
Коли голод в бріху сьпіват
В корчмі гварят жид всіх лупит
А сам тайком пє на віват
Рад не рад взяли русини
З кишень своїх по кус гроши
І купили солонини
Бо сало било дорожше
Вона подібна до сала
Хоц смерділа старовином
Юж ослизла і зялчала
Їсти мож єй юж лем з хріном
Так кус зіли кусцьок скрили
Бо то ріжні бити може
З шафарями погварили
Што ся придаст в подорожи
Тоти гварят хліб сушений
Горівка і чиста вода
Бронь Біг брати з собом жени
На шифі баба зашкодит
Добри керпці гуня пояс
Й своє рідне Слово Боже
Чорти ся го всядиль боят
Воно жити вам поможе
Як вшитко будете мати
Помольтеся в своїй вірі
Яку передала мати
Лем помольтеся барз щиро
Коли Пан Біг вас почує
І простит ваши провини
Прийдте до ня як я ту є
Може возму вас в чужину.
