Зас смотрят Карпати
Чи свої приїдут
На Лемківську Ватру
В обійми Бескидів
Чи свічку засвітят
Попрячут могилу
Чи привезут вітця
Штоб дихнув кадилом
Чи повідят дітьом
Што потихи плачут
Очи ся кус сьвітят
Як видят боляче
Нияк їм забити
Юж і слизи линут
Бо лемко любити
Буде Лемківщину
За втраченом нивом
І дідовом хижом
За церковним сьпівом
І за пісном їжом
Церквом што костелом
З ніей ближні зробили
Коли нас вимели
І своє творили
Ищи кус і Ватра
Зас загварит в Ждині
Поїдте бо вартат
Бити як в родині
З’їдуться лемкове
Штоб кус бити в себе
Вчути вітців слово
Бо того їм треба
Їд і не нарікай
Же пінязи стратиш
Та ж ти не каліка
Там будеш богатий
В рідній Лемківщині
Яка на тя чекат
Вертай на коріня
Як до ся лелека
Свій там найде свого
На земли русинів
Не забуд дороги
В рідну Лемківщину
Де жили прадіди
Де гварили з Богом
Вертай до Бескидів
Не затрат дороги
11.06.2010р.
